अंतरीचा गंध माझ्या

 

या चेहरापुस्तकावरून (फेसबुक ) कित्येक वर्षानी मित्र - मैत्रिणी भेटणे , आपला लहानपणापासूनचा मित्र इथे अमेरिकेत हाकेच्या अंतरावर राहतो हे  कळल्यावर अतिशय आनंद होणे ही अनुभव सगळ्यांना  येतात. परंतु आपले आवडते शिक्षक अनपेक्षितपणे भेटतात तेव्हा मात्र आश्चर्य वाटते . आम्हा विद्यार्थ्याना शोधण्यासाठी आंतरजालावर त्यांचा अमूल्य वेळ खर्च करतात हे लक्षात येते तेव्हा मानतात विचार येतो,’खरंच इतकं भरभरून प्रेम गुरुकडून मिळावं इतकी पात्रता आहे का आपली ? एखाद वर्षापूर्वी आमच्या आवडत्या नाईकबाई मला अशाच फेसबुकवर भेटल्या मला आवाज तरी ऐकायला मिळावा म्हणून फोन केला . तर प्रथम वाक्यच हे  होतं ‘तुम्ही मुली बी एड करता , मग निघून जाता कुठे तरी नोकरीला. मागे काही अडकलं आहे कुठे बंध निर्माण झालेत आठवतही नाही का गं ? आजच तुझी आठवण आली . तू दिलेलं अष्टगंध देवाला लावायला काढलं . बाई काय सांगू ? मी सुद्धा त्या आठवणीत रमले . बी एड चा कोर्स उणापुरा न्यू महिन्याचा असतो . हा कोर्स म्हणजे पुनर्जन्मच असतो विद्यार्थ्यांचा ! शिक्षण प्रशिक्षक खूप प्रेमळ आधार देतात . आत्मविश्वास निर्माण करतात . ज्ञान आणि ज्ञानाचे संक्रमण यातला सेतू कसा बांधायचा याचं तंत्र शिकवतात . तेव्हाच तर साठ  विद्यार्थ्यांसमोर उभं राहायची हिम्मत येते . त्यांना कृतार्थ होऊन काय भेट देणार ? मला प्रश्नच पडला होता बाईना भेटायला जाताना. माझ्या आईने चुटकीसरशी हा प्रश्न सोडवला . त्या  अष्टगंधाचा आणि आठवणींचा सुगंध आज इतक्या वर्षानीही मनात रेंगळतोय .. पुन्हा लहान व्हावंसं वाटतंय .. ते हि नो दिवसा गता: |  © श्रेया श्रीधर महाजन, कॅलिफोर्निया . पूर्वप्रसिद्धी दिव्य मराठी १८ ऑक्टोबर २०११