चेरी घ्या चेरी! साखरलाडू सस्ते लावले!

 

हा फोटो आणि काही आठवणी....चेरी घ्या चेरी! साखरलाडू सस्ते लावले! असं ओरडावसं वाटलं मला....!

एक दोन दिवसांपूर्वी चेरी पिकिंगला गेलो होतो ब्रेन्टवुडला ! धमाल केली! इकडे फ़ळं पिकण्याचा हंगाम असेल तेव्हा अनेक शेतांवर जाउन हवी तितकी फ़ळं घेऊन खायची मुभा असते! जे पोटातून नेऊ ते फ़ुकट आणि हातातून नेऊ त्याचे फ़क्त पैसे भरावे लागतात. 200-250 झाडं असतील आम्ही गेलो होतो तिथे. प्रत्येक झाडाजवळ जायचं चेरी चाखायच्या, गोड लागल्या तर टोपलीत भरायच्या. असं करत खूप फ़िरतात सगळे जण!

हे मात्र खरोखर परीसासारखं आहे. आपण प्रत्येक चेरी तोंडात घालतो , पुढे जातो. गोड लागली म्हणून मागे वळून त्याच झाडाच्या परत खाव्या तर झाड कोणतं ते ओळखताच येत नाही. मग पुन्हा चवी पहाणं. हे करता करता पोट तुडुंब भरतं आणि करंडी बरीचशी रिकामी रहाते.

एकूणच शेतावर जाणं, हाताने फ़ळं तोडून खाणं हा आजकाल क्वचित मिळणारा अनुभव ....! नाहीतर आमची मुले भविष्यात कॉस्टको ( घाऊक फळांचे दुकान) मधे चेरी पिकतात, खोक्या मधे बसतात आणि घरी आणता येतात असे सांगतील. © श्रेया श्रीधर महाजन १४ जून २०११